1937-1938 წლების წითელი ტერორის სახელით ცნობილმა სტალინურმა რეპრესიებმა მძიმე დარტყმა მიაყენა ქართულ სახელოვნებო საზოგადოებას. სხვადასხვა ბრალდებით გასამართლდნენ და დახვრეტა მიესაჯათ დიმიტრი შევარდნაძეს, ვახტანგ კოტეტიშვილს, ჰენრიჰ ჰრინევსკის, რიჰარდ ზომერსა და პეტრე ოცხელს. წლები გაატარეს საბჭოთა ბანაკებში გადასახლებულმა კირილ ზდანევიჩმა, ვასილ შუხაევმა, რაისა მიქაძემ, ვანო პატარიძემ თუ სხვებმა ხოლო მათ, ვინც დახვრეტასა და გადასახლებას გადაურჩა, ცხოვრება და შემოქმედება ტოტალიტარულ სისტემაში უწევდათ, სადაც ხელოვნება სახელისუფლებო იდეების სამსახურში იყო ჩაყენებული.
გამოფენის მიზანია კიდევ ერთხელ ნათელი ჩვენება იმ მნიშვნელოვანი წყვეტისა კულტურის განვითარებაში, რომელიც სტალინური რეპრესიების შედეგად ქართულმა სახელოვნებო სივრცემ განიცადა და ის, თუ რა გავლენა მოახდინა ხელოვნების ტოტალურმა იდეოლოგიზაციამ ქართულ სახვით ხელოვნებაზე. გამოფენაზე წარმოდგენილი იქნება ფერწერა, გრაფიკა, ქანდაკება. უნიკალური ვიდეომასალა.
